កាលពីថ្ងៃទី ០៦ ខែធ្នូ ឆ្នាំ ២០២២ កន្លងទៅ មហាជននាំគ្នាផ្ទុះការចាប់អារម្មណ៍នូវសមត្ថភាពរបស់ក្មេងប្រុសមួយរូបឈ្មោះ គីមហុង ដែលមានវ័យទើប ១៣ ឆ្នាំ តែមានសមត្ថភាពអាចប្រឡងសញ្ញាបត្រមធ្យមសិក្សាទុតិយភូមិ។
ចំពោះរឿងរ៉ាវក្មេងប្រុសខាងលើ តាមរយៈគណនីលោក ដួង តារា ជំនួយការផ្ទាល់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ឱ្យដឹងថាក្មេងប្រុស ហ៊ឺ ទៀងគីមហុង មានអាយុ ១៣ ឆ្នាំ បានខិតខំរៀនសូត្ររហូតឈានដល់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី ០៥ ធ្នូ ២០២២ នេះ។
អ្វីដែលកាន់តែចាប់អារម្មណ៍ បើយោងតាមការប្រកាសលទ្ធផលរបស់ក្រសួងអប់រំ នៅថ្ងៃទី ២២ ខែធ្នូ ឆ្នាំ ២០២២ នេះ ប្អូនប្រុស ហ៊ឺ ទៀងគីមហុង បានប្រឡងជាប់សញ្ញាបត្រមធ្យមសិក្សាទុតិយភូមិហើយ ដោយទទួលបាននិទ្ទេស C។
សូមរំឭកផងដែរថា កាលពីឆ្នាំ ២០១៧ កន្លងទៅ ក្មេងប្រុស ហ៊ឺ ទៀងគីមហុង បានធ្វើឱ្យមហាជននាំគ្នាផ្ទុះការចាប់អារម្មណ៍ ក្រោយរូបគេអាយុទើបតែ ៧ ឆ្នាំ តែមានសមត្ថភាពយ៉ាងពូកែ អាចធ្វើលំហាត់គណិតវិទ្យាថ្នាក់ទី ១២ បានគួរឱ្យស្ញើចសរសើរ៕
ប្រភព៖ ប្រជាប្រិយ
