កាលពីថ្ងៃទី ២៤ ខែមីនា ឆ្នាំ ២០២៣ កន្លងទៅនេះ រឿងរ៉ាវដ៏ក្ដៅគគុកមួយកំពុងផ្ទុះការជជែកវែកញែកពីសំណាក់អ្នកប្រើប្រាស់បណ្ដាញសង្គមហ្វេសប៊ុក បន្ទាប់ពីគណនីហ្វេសប៊ុកមួយឈ្មោះថា បង តិច បានបង្ហោះសាររៀបរាប់មិនពេញចិត្តជាខ្លាំងនូវទង្វើរបស់មន្ត្រីប៉ូលិសចរាចរណ៍មួយក្រុម ស្ថិតនៅម្ដុំស្តុបថៃហ្គឺ សង្កាត់ព្រែកឯង រាជធានីភ្នំពេញ ដោយឃាត់រថយន្តរបស់ខ្លួនដែលបងប្រុសបានខ្ចីប្រើប្រាស់នៅថ្ងៃទី ២០ ខែមីនា ឆ្នាំ ២០២៣ កន្លងទៅ ហើយចោទប្រកាន់ថារថយន្តមួយគ្រឿងនោះ ប្រើប្រាស់ឯកសារក្លែងក្លាយ។
ក្រោយមក មន្ត្រីប៉ូលិសនៅស្តុបខាងលើនោះក៏បានបង្គាប់ឱ្យប្រគល់លុយចំនួន ១០០០ ដុល្លារ ទើបឱ្យរថយន្តចេញទៅវិញ ប៉ុន្ដែខាងសាមីរថយន្តមិនព្រម ដោយសុំឱ្យត្រឹមតែ ៥ ម៉ឺនរៀល។ លុះសម្របសម្រួលគ្នាចុះឡើងអស់រយៈពេលជាច្រើនម៉ោង ខាងមន្រ្តីប៉ូលិសក៏សម្រួលមកត្រឹម ១៣៥ ដុល្លារ ចំណែកឯខាងសាមីអ្នកបើករថយន្តក៏ព្រមឱ្យ ព្រោះមូលហេតុប្រញាប់ទៅធ្វើបុណ្យមិនចង់ខាតពេលវេលាយូរជាងនេះ។ នេះបើតាមការរៀបរាប់ពីគណនីឈ្មោះ បងតិច។
ម្ចាស់គណនីឈ្មោះ បងតិច ក៏បានបន្ថែមទៀតថា ខណៈដោះស្រាយគ្នារួចរាល់ហើយ មន្រ្តីប៉ូលិសខាងលើក៏បានប្រាប់ដល់សាមីអ្នកបើករថយន្តថា ហាមមិនឱ្យបង្ហោះរូបភាពនៅលើបណ្ដាញសង្គមទៀតផង។
យ៉ងណាមិញ ស្រាប់តែនៅថ្ងៃទី ២៤ ខែមីនា ឆ្នាំ ២០២៣ តាមរយៈគណនីហ្វេសប៊ុកឈ្មោះ បង តិច គេឃើញម្ចាស់រថយន្តផ្ទាល់អះអាងថាជាប្អូនស្រីបានបង្ហោះសារមិនពេញចិត្តជាខ្លាំងនូវការចោទប្រកាន់ពីមន្រ្តីប៉ូលិសស្តុបថៃហ្គឺថារថយន្តរបស់ខ្លួនប្រើប្រាស់ឯកសារក្លែងក្លាយ ហើយថែមទាំងបានប្រកាសទារលុយ ១៣៥ ដុល្លារដែលបានយកពីបងប្រុសរបស់ខ្លួនត្រឡប់មកវិញទៀតផង ជាមួយនឹងការភ្ជាប់ឯកសារផ្សេងមកផងដែរ៕
