មហាជនអ្នកប្រើប្រាស់បណ្ដាញសង្គមបាននាំគ្នាផ្ទុះការភ្ញាក់ផ្អើល ក្រោយបានជ្រាបករណីប្រទះឃើញទារិកាមួយរូបត្រូវគេបោះបង់ចោលនៅផ្ទះជួលមួយកន្លែងមានទីតាំងនៅភូមិព្រែកតាព្រីង សង្កាត់សិត្បូ ក្រុងតាខ្មៅ ខេត្តកណ្ដាល ដែលក្រោយពីទទួលបានព័ត៌មាននេះ លោក សែត វន្នី ដែលជាចៅសង្កាត់សិត្បូ បានឱ្យលោក សាន សូត្រ បញ្ជូនទារិកានោះទៅមណ្ឌលសុខភាពដើម្បីសង្គ្រោះ។
យ៉ាងណាមិញ នៅល្ងាចថ្ងៃទី ២៨ ខែមីនា ឆ្នាំ ២០២៣ កន្លងទៅនេះ បើតាមការឱ្យដឹងពីរដ្ឋបាលសង្កាត់សិត្បូ បានបញ្ជាក់ពីមរណភាពទារិកាកម្សត់ខាងលើ និង សូមឱ្យទារិកាទៅឱ្យបានក្តីសុខ កើតជាតិណាៗសូមកុំឱ្យអភ័ព្វដូចជាតិនេះទៀត។
ក្រោមការបញ្ជូនសង្គ្រោះ រហូតដល់ជីវិតចុងក្រោយនៃទារិកា រដ្ឋបាលសង្កាត់សិត្បូ បានថ្លែងអំណរគុណចំពោះ មណ្ឌលសុខភាពសិត្បូ អភិបាលក្រុងតាខ្មៅ ប្រធានការិយាល័យសុខាភិបាលប្រតិបត្តិក្រុងតាខ្មៅ មន្ទីរពេទ្យបង្អែកជ័យជម្នះ មន្ទីរពេទ្យគន្ធបុប្ផា អង្គការមិត្តសម្លាញ់ និងអាជ្ញាធរពាក់ព័ន្ធទាំងអស់ដែលបានខិតខំស្វះស្វែងជួយក្មួយស្រីអស់ពីលទ្ធភាពផងដែរ៕ អត្ថបទ៖ ប្រជាប្រិយ
