នៅថ្ងៃទី ៣០ ខែវិច្ឆិកា ឆ្នាំ ២០២២ កម្មវិធីកីឡាជាតិលើកទី ៣ នឹងឈានដល់ទីបញ្ចប់ ហើយជាមួយគ្នានោះក៏មានកម្មវិធីបិទដ៏ធំមួយនឹងប្រារព្ធឡើងនៅពហុកីឡដ្ឋានជាតិមរតកតេជោ រាជធានីភ្នំពេញ។
យ៉ាងណាមិញ ថ្ងៃបិទព្រឹត្តិការណ៍ជាតិលើកទី ៣ នេះ នឹងមានការចូលរួមសម្តែងពីសំណាក់សិល្បករ សិល្បការិនីជាច្រើនរូបដោយក្នុងរួមមាន តារាចម្រៀងរ៉េប វណ្ណដា ផងដែរ។ លើសពីនោះ ផ្ទាំងទស្សនីយភាព ដែលតារាចម្រៀង រ៉េប វណ្ណដា នឹងលើកយកមកសម្តែងនោះ គឺបទ «Time To Rise»។
ជាការពិតណាស់ បទចម្រៀង «Time To Rise» របស់តារាចម្រៀងរ៉េប វណ្ណដា ក៏មានការចូលរួមបកស្រាយពីសំណាក់ ព្រឹទ្ធាចារ្យចាប៉ីដងវែង លោកតា គង់ ណៃ ដោយហេតុនេះ បានធ្វើឱ្យមហាជនក៏រំពឹងទុកថានៅល្ងាចថ្ងៃនេះ អាចនឹងឃើញវត្តមានរបស់លោកតាចូលរួមសម្តែងក្នុងកម្មវិធីថ្នាក់ជាតិនេះដែរ។
យ៉ាងណានៅថ្ងៃទី ៣០ ខែវិច្ឆិកា ឆ្នាំ ២០២២ ពោលគឺមិនសល់ប៉ុន្មានម៉ោងទៀតនៃការចាប់ផ្តើមកម្មវិធីបិទកីឡាជាតិលើកទី ៣ ស្រាប់តែតាមរយៈហ្វេសប៊ុកមានឈ្មោះ «បង ខាន់ សារ៉ាក់» បានធ្វើការឡាយវីដេអូសកម្មភាពក្នុងឡាន ដោយមានការរួមដំណើរពីលោកតា គង់ ណៃ ដែលធ្វើមហាជនជឿជាក់ថា ល្ងាចនេះច្បាស់ជាមានវត្តមានរបស់លោកតាក្នុងការចូលរួមសម្តែងយ៉ាងពិតប្រាកដមែន។ លើសពីនោះ មហាជនក៏កំពុងតែរំពឹងមើលភាពអស្ចារ្យនៃផ្ទាំងទស្សនីយភាព បទ «Time To Rise» ដែលធ្វើការសម្តែងដោយផ្ទាល់ថែមទៀតផង៕
សូមទស្សនាវីដេអូខាងក្រោម៖
ប្រភព៖ ប្រជាប្រិយ
