គិតមកទល់ពេលនេះ រយៈពេលជិតមួយឆ្នាំហើយដែលតារាសម្ដែងស្រី Tangmo បានចាកចេញទៅគ្មានថ្ងៃនឹងអាចវិលត្រឡប់វិញបាន។ ទន្ទឹមនឹងការចាកចេញដ៏សែនក្រៀមក្រំនេះ បានធ្វើឱ្យមហាជនអ្នកគាំទ្រក្នុង និង ក្រៅប្រទេសមានការនឹករឭកដល់នាងជាខ្លាំង។
ដ្បិតតែរូបកាយបានចាកចេញទៅគ្មានថ្ងៃអាចវិលត្រឡប់បានមែន តែរាល់អនុស្សាវរីយ៍ ការចង់ចាំផ្សេងៗរបស់នាង មហាជនតែងដក់ជាប់ក្នុងចិត្តជានិច្ច។ តួយ៉ាងកាលពីថ្ងៃទី ៣១ ខែធ្នូ ឆ្នាំ ២០២២ កន្លងទៅនេះ ស្រាប់តែធ្វើឱ្យមហាជនមានការផ្ញើក្តីនឹករឭកចំពោះ តារាស្រី Tangmo ខ្លាំងណាស់ ក្រោយហ្វេសប៊ុកផេក Happy Melon Official ចេញមកបង្ហោះវីដេអូរបស់តារាស្រី Tangmo រំភើបចិត្តទាំងទឹកភ្នែកខណៈដែលបានមើលកាំជ្រួចឆ្លងឆ្នាំជាមួយនឹងសង្សារនៅរាត្រីឆ្លងចូលឆ្នាំ ២០២២ ។
គួរបញ្ជាក់ផងដែរ តារាស្រី Tangmo បានទទួលមរណភាពនៅថ្ងៃទី ២៤ ខែកុម្ភៈ ឆ្នាំ ២០២២ ដោយសារតែជួបឧបទ្ទវហេតុធ្លាក់ពីលើទូកនៅដងទន្លេចៅផាយ៉ា ខណៈជួបជុំមិត្ត Party ។ ក្នុងនោះ សម្រាប់សំនុំក្ដីរបស់តារាស្រី Tangmo បានបិទបញ្ចប់រួចរាល់ហើយ ដោយម្តាយតារាស្រីរូបនេះព្រមទទួលប្រាក់សំណងពីបណ្ដាមិត្តភក្តិ ៥ នាក់ ឯទៀតដែលនៅលើទូកជាមួយគ្នា៕ ប្រភព៖ ប្រជាប្រិយ
