បុរសម្នាក់នៅប្រទេសថៃត្រូវអស់គូទខោ ក្រោយប្រពន្ធរបស់លោក បានយកលុយដែលលោកឈ្នះឆ្នោត រត់ទៅជាមួយសហាយស្មន់បាត់។ បុរសដែលត្រូវស្គាល់ឈ្មោះថា Manit ជាអ្នកខេត្ត Isaan បានឈ្នះឆ្នោតក្នុងប្រាក់យ៉ាងសន្ធឹករហូតដល់ ៦ លានបាត (ប្រមាណ ១៦៧ ៣២៤ ដុល្លារ) កាលពីថ្ងៃទី ០១ ខែវិច្ឆិកា ឆ្នាំ ២០២២ កន្លងទៅ។ ក្រោយទទួលប្រាក់ឈ្នះឆ្នោតភ្លាម បុរសវ័យ ៤៩ ឆ្នាំរូបនេះ ក៏បានវេរលុយ ៥ ៩៧០ ០០០ បាត (ចំនួនប្រាក់ក្រោយកាត់ពន្ធ) ទៅឱ្យប្រពន្ធភ្លាម។
ការបង្ហាញក្ដីស្រឡាញ់ចំពោះភរិយាពីសំណាក់លោក Manit គឺសមគួរតែទទួលបានក្ដីស្រឡាញ់ពោរពេញដោយសុភមង្គលតបមកវិញ ប៉ុន្តែអ្វីៗបែរផ្ទុយស្រឡះ ព្រោះថាភរិយារបស់លោក បែរជាយកលុយដែលប្ដីខំឱ្យទាំងនោះ យករត់ទៅកសាងជីវិតថ្មីជាមួយប្រុសស្នេហ៍របស់នាងទៅវិញ។
តាមសម្ដីលោក Manit ថ្លែងប្រាប់សាច់រឿងឈឺចាប់របស់លោកប្រាប់ទៅកាន់ប៉ូលិសថា លោកបានរួមរស់ជាមួយភរិយារយៈពេល ២៦ ឆ្នាំមកហើយ និងទទួលបានកូនចំនួន ៣ នាក់ជាចំណងដៃរួមគ្នា។ លោកបានឱ្យដឹងទៀតថា ជីវិតប្ដីប្រពន្ធរបស់លោកគឺមិនដែលមានបញ្ហាជាមួយគ្នាពីមុនមកនោះឡើយ សូម្បីដែលពេលឈ្នះឆ្នោតនេះ លោក និង ប្រពន្ធ ក៏បាននិយាយគ្នាសម្រេចចិត្តចូលបច្ច័យប្រាក់ ១ លានបាតដល់វត្តមួយកន្លែងផងដែរ រួមទាំងអញ្ជើញមិត្តភក្តិ ក្រុមគ្រួសារសាច់ញាតិ ធ្វើពិធីប្រគេនបច្ច័យនេះថែមទៀត។
ក្នុងពិធីនោះ លោក Manit ក៏បានឃើញបុរសមិនស្គាល់មុខម្នាក់ ប៉ុន្តែភរិយាលោកបានមកបញ្ជាក់ប្រាប់ថាជាសាច់ញាតិគាត់ រហូតចុងក្រោយទើបបែកធ្លាយដឹងថា តាមពិតបុរសរូបនោះ គឺជាសាហាយប្រពន្ធលោកសោះ។
ប្រពន្ធលោក Manit បានយកលុយឈ្នះឆ្នោតដែលនៅសល់ រត់គេចទៅជាមួយសាហាយដល់ខេត្ត Nong Kai ដែលមានចម្ងាយប្រមាណ ២៦៨ គីឡូម៉ែត្រពី Roi Et។ ជារឿងដ៏សោកស្ដាយនោះគឺថា ប៉ូលិសមិនអាចជួយលោក Manit ក្នុងការយកប្រាក់ដែលឈ្នះឆ្នោតនោះមកវិញបាននោះឡើយ ដោយសារតែលុយនោះ លោកបានវេរទៅឱ្យកុងធនាគាររបស់ប្រពន្ធលោកទៅហើយ។ ដោយអស់ជម្រើស លោក Manit ក៏បានមករកខាងសារព័ត៌មានរៀបរាប់ពីរឿងមួយនេះ ក្នុងក្ដីសង្ឃឹមថា ប្រពន្ធរបស់លោកអាចមានចិត្តត្រឡប់ប្រគល់លុយជូនលោកវិញ៕
